Heilbrigðis- kerfið á Íslandi

Landinu er skipt í sjö heilbrigðisumdæmi. Í heilbrigðisumdæmunum er að finna heilbrigðisstofnanir og/eða heilsugæslustöðvar. Heilsugæslustöðvar veita almenna heilbrigðisþjónustu fyrir umdæmið, svo sem heilsugæslu, læknisskoðanir, rannsóknir, læknismeðferð, hjúkrun á sjúkrahúsum, endurhæfingu, hjúkrun aldraðra og tannlækningar.

Allir sem hafa átt lögheimili á Íslandi í sex mánuði samfleytt eru sjúkratryggðir. Sjúkratryggingar Íslands ákvarða hvort ríkisborgarar EES og EFTA landa eigi rétt til að flytja sjúkratryggingaréttindi til Íslands.

Í íslensku heilbrigðiskerfi er notast við greiðsluþátttökukerfi sem lækkar útgjöld fólks sem þarf að sækja mikla heilbrigðisþjónustu.

Hámarksgreiðsla frá 1. janúar 2022 er 28.162 kr. Hins vegar er kostnaður lægri fyrir aldraða, öryrkja og börn eða 18.775 kr. Greiðslur fyrir veitta þjónustu á heilsugæslustöðvum og sjúkrahúsum falla undir greiðsluþátttöku ríkisins, ásamt heilbrigðisþjónustu sjálfstætt starfandi lækna, sjúkraþjálfara, iðjuþjálfa, talmeinafræðinga og sálfræðinga. Lestu þér frekar til um greiðsluþátttökukerfið hér.

Fyrir frekari upplýsingar um íslenska heilbrigðiskerfið, smelltu hér.

Hið opinbera starfrækir vefsíðu sem kallast Heilsuvera en þar má finna allskyns upplýsingar um sjúkdóma og forvarnir sem og fyrirbyggjandi leiðir til heilbrigðara og betra lífs.

Á Heilsuveru er hægt að skrá sig inn á “Mínar síður” en þar má bóka tíma, endurnýja lyf, eiga örugg samskipti við heilbrigðistarfsfólk og ýmislegt fleira.

Til að skrá sig inn er notast við rafræn skilríki.

Heilsuvera er enn sem komið er einungis á íslensku.

Ert þú heilbrigðisstarfsmaður eða menntaður og getur unnið sem slíkur? Hefur þú áhuga á að starfa sem heilbrigðisstarfsmaður á Íslandi?

Landlæknir veitir leyfi til að nota starfsheiti löggiltrar heilbrigðisstéttar og til að starfa sem heilbrigðisstarfsmaður á Íslandi.

Nánari upplýsingar um þetta og hvað þarf að gera í tilfelli hverrar starfsstéttar er að finna á þessari síðu Landlæknisembættisins.

Ef þú ert með sértækar spurningar varðandi þessi mál, vinsamlegast hafðu samband við Landlæknisembættið með því að senda á netfangið starfsleyfi@landlaeknir.is