Styrkur til íþrótta- og tómstundastarfs

Vissir þú að vegna COVID-19 er hægt að sækja um styrk til þess sveitarfélags sem þú átt heima í fyrir íþrótta- og tómstundastarfi barna sem fædd eru á árunum 2005-2014 og búa á heimilum þar sem heildartekjur framfærenda, voru að meðaltali lægri en 740.000 kr. á mánuði á tímabilinu mars-júlí 2020.

Þú getur notað íþrótta- og tómstundastyrkina til þess að niðurgreiða þátttökugjöld barna vegna íþróttaiðkunar eins og fótbolta, körfubolta, fimleika eða annarra íþrótta en einnig vegna tónlistarnáms eða annarra tómstunda en þú finnur upplýsingar hjá þínu sveitarfélagi um hvernig er hægt að ráðstafa styrknum.

Styrkurinn er 45.000 kr. fyrir hvert barn

Áður en sótt er um styrkinn hjá þínu sveitarfélagi þarf að kanna hvort heimilið falli undir ofangreint tekjuviðmið. Það gerir þú með því að skrá þig inn á island.is með rafrænum skilríkjum og er þar hægt að sækja upplýsingarnar til skattayfirvalda. Upplýsingar á island.is eru á íslensku, ensku og pólsku. Athugið að sé um hjón/sambúðarfólk að ræða þurfa báðir aðilar að samþykkja að upplýsingar um tekjur séu sóttar til skattayfirvalda (RSK) í gegnum island.is.

Ef þú færð svar um að þú eigir rétt á að sækja um styrk færð þú nánari upplýsingar um næstu skref á island.is. Ef þú færð svar um að þú eigir ekki rétt á styrk færð þú upplýsingar um hvert hægt sé að leita ef þú ert með athugasemdir við niðurstöðuna eða fyrir fyrirspurnir.

  • Hægt er að sækja um styrk til 1. mars 2021.
  • Miðað er við að íþrótta- og tómstundaiðkunin fari fram á skólaárinu 2020-2021.

Sveitarfélög setja reglur um úthlutun styrkjanna og fyrirkomulag getur verið breytilegt á milli sveitarfélaga til dæmis varðandi:

  • hvaða íþrótta- og tómstundastarf fellur undir styrkina,
  • hvaða gögnum beri að skila með umsókn,
  • afgreiðslutíma umsókna.

Fyrirspurnum varðandi styrkina beinir þú til þíns sveitarfélags.

Hér er hægt að fara á island.is þar sem hægt er að kanna hvort þú eigir rétt á styrki.

Meðferð persónuupplýsinga

Í þeim tilgangi að meta hvort þú fallir undir tekjuviðmiðið og eigir rétt á styrk, eða ekki, er unnið með eftirfarandi persónuupplýsingar: nöfn og kennitölur heimilismanna, lögheimili, fjölskyldunúmer auk upplýsinga um tekjur heimilismanna á tímabilinu mars-júlí 2020. Þegar skattayfirvöld hafa fengið rafrænt undirritað umboð frá þér um að sækja megi upplýsingar um tekjur er þeim upplýsingum miðlað til island.is. Þitt sveitarfélag hefur einnig aðgang að framangreindum upplýsingum inni á island.is.

Vinnsla persónuupplýsinga og varðveisla þeirra í tengslum við umsókn um íþrótta- og tómstundastyrk er á ábyrgð island.is. Vinnsla persónuupplýsinga vegna reksturs island.is er á ábyrgð fjármála- og efnahagsráðuneytisins, Lindargötu 7, 101 Reykjavík.

Nánari upplýsingar um vinnslu persónuupplýsinga hjá Stjórnarráði Íslands má finna í persónuverndarstefnu þess, svo sem um varðveislutíma upplýsinga og réttindi þín, https://www.stjornarradid.is/medferd_personuupplysinga

Vinsamlegast athugið að ofangreint á einungis við um island.is og gilda aðrar reglur um meðferð persónuupplýsinga þegar kemur að sjálfu umsóknarferlinu hjá þínu sveitarfélagi.