Ofbeldi gegn fötluðu fólki

Ofbeldi gegn fötluðu fólk hefur margar birtingarmyndir og getur til dæmis birst í andlegu, líkamlegu og kynferðislegu ofbeldi. Þá lýsir ofbeldi gegn fötluðu fólki sér líka þannig að fólk er þvingað til þess að gera eitthvað sem það vill ekki gera, því er hótað eða því neitað um nauðsynlega aðstoð.

 Fatlaðar konur eru í meiri hættu á að verða fyrir ofbeldi en fatlaðir karlar og ófatlaðar konur. Þá eru fötluð börn sérstaklega berskjölduð fyrir ofbeldi af öllu tagi. Stundum getur verið erfitt að koma auga á hvað ofbeldi er og erfitt að viðurkenna fyrir sjálfum sér að ofbeldi hafi átt sér stað.

 Hvert get ég leitað ef ég hef orðið fyrir ofbeldi?

  • Hægt er að hringja eða senda SMS í lögregluna í síma 112.
  • Neyðarmóttaka vegna kynferðisofbeldis er á bráðamóttöku Landspítalans í Fossvogi. Mikilvægt er að koma sem fyrst eftir að ofbeldið hefur átt sér stað. Sími 543 1000
  • Stígamót aðstoða fólk sem hefur orðið fyrir kynferðislegu ofbeldi að vinna úr afleiðingum ofbeldis. Nánari upplýsingar á https://www.stigamot.is/
  • Drekaslóð tekur á móti fólki sem orðið hefur fyrir ofbeldi eða einelti. Nánari upplýsingar á https://drekaslod.is/
  • Aflið eru samtök gegn kynferðis- og heimilisofbeldi á Akureyri. Sjá nánar á https://aflidak.is/   
  • Kvennaathvarfið rekur athvarf fyrir konur og börn þeirra sem ekki geta búið heima hjá sér vegna ofbeldis. Nánari upplýsingar á https://www.kvennaathvarf.is/

Bjarkarhlíð er miðstöð fyrir þolendur ofbeldis. Nánari upplýsingar á https://www.bjarkarhlid.is/

Heimild: Hrafnhildur Snæfríðar- og Gunnarsdóttir og Rannveig Traustadóttir, „Ofbeldi gegn fötluðum konum“, Rannsóknarsetur í fötlunarfræðum (2015).

AUÐLESIÐ

Ofbeldi

Ofbeldi gegn fötluðu fólki er margs-konar. Ofbeldi er það þegar einhver meiðir þig eða lætur þér líða illa.

Andlegt ofbeldi er þegar einhver hótar þér, gerir lítið úr þér eða lætur þér líða illa.

Líkamlegt ofbeldi er þegar einhver meiðir þig, hrindir þér, klípur eða sparkar í þig.

Kynferðislegt ofbeldi er það þegar einhver neyðir þig til að gera eitthvað kynferðislegt sem þú vilt ekki gera eða káfar á þér. Það þýðir að snertir þig á kynferðislegan hátt þegar þú vilt það ekki.

Ofbeldi getur líka verið að neita þér um aðstoð sem þú þarft nauðsynlega.

Fatlaðar konur eru í meiri hættu á að verða fyrir ofbeldi heldur en fatlaðir karlar og ófatlaðar konur. 

Fötluð börn eru líka í hættu á að verða fyrir ofbeldi. 

Stundum getur verið erfitt að skilja hvað ofbeldi er. Það getur líka verið erfitt að viðurkenna að einhver hafi verið vondur við mann og beitt mann ofbeldi.

Hvað get ég gert ef ég verð fyrir ofbeldi eða hef orðið fyrir ofbeldi?

  • Það er hægt að hringja eða senda skilaboð til lögreglu í síma 112. 
  • Á spítalanum í Fossvogi er neyðar-móttaka fyrir fólk sem hefur orðið fyrir kynferðisofbeldi. Það er mikilvægt að fara sem fyrst eftir ofbeldið þangað. Símanúmerið þar er 543 1000.
  • Stígamót hjálpa fólk sem hefur orðið fyrir kynferðislegu ofbeldi að líða betur, en oft finna þeir sem verða fyrir ofbeldi fyrir slæmum tilfinningum eins og til dæmis skömm og kvíða. Þú getur fengið meiri upplýsingar hér: https://www.stigamot.is/
  • Drekaslóð hjálpar fólki sem orðið hefur fyrir ofbeldi eða einelti.  Þú getur fengið meiri upplýsingar hér: https://drekaslod.is/
  • Aflið er á Akureyri. Það eru samtök sem sem hjálpa fólki sem hefur orðið fyrir kynferðisofbeldi eða heimilisofbeldi. Þú getur fengið nánari upplýsingar hér: https://aflidak.is/
  • Kvennaathvarfið er hús þar sem konur og börn geta fengið að búa í stuttan tíma ef það er ofbeldi á heimili þeirra.  Þú getur fengið meiri upplýsingar hér: https://www.kvennaathvarf.is/

Bjarkarhlíð taka á móti þeim sem hafa orðið fyrir ofbeldi. Þar er hægt að fá stuðning og góð ráð. Þú getur fengið meiri upplýsingar hér: https://www.bjarkarhlid.is/

Heimild: Hrafnhildur Snæfríðar- og Gunnarsdóttir og Rannveig Traustadóttir, „Ofbeldi gegn fötluðum konum“, Rannsóknarsetur í fötlunarfræðum (2015).