Kennitölu-umsókn EES ríkisborgara
Skammtímadvöl á Íslandi
Ríkisborgarar EES/EFTA ríkja mega koma til landsins án sérstaks leyfis og dvelja eða starfa hér á landi í þrjá mánuði áður en lögheimili er skráð og sex mánuði ef viðkomandi er í atvinnuleit. Þeir sem hyggja á slíka skammtímadvöl gætu þurft kennitölu til að njóta tiltekinnar þjónustu.
Til að mynda mega EES/EFTA borgarar vinna hér á landi í allt að þrjá mánuði án þess að skrá lögheimili en þá þurfa þeir skattkort. Ef svo ber undir þarf atvinnurekandi, eða sá aðili sem einstaklingurinn þarf þjónustu hjá (t.d. vátryggingafélag) að sækja um kennitölu hjá Þjóðskrá Íslands.
Viðkomandi er þá skráður í sérstaka kennitöluskrá með tímabundið aðsetur á Íslandi, en lögheimili erlendis.
Langtímadvöl
Ríkisborgarar EES/EFTA ríkja sem hyggja á langtímadvöl hér á landi fylla út eyðublaðið ,,Skráning EES eða EFTA útlendings hjá Þjóðskrá Íslands”. Eyðublaðið gildir bæði sem umsókn um kennitölu og lögheimilisskráningu.
Eyðublaðið er hægt að nálgast á skrifstofu Þjóðskrár Íslands eða rafrænt hér.
Umsækjandi verður að skila eyðublaðinu undirrituðu í eigin persónu, ásamt fylgigögnum (í frumriti eða staðfestu afriti), til Þjóðskrár Íslands í Reykjavík, á skrifstofur sveitarfélaga, eða til sýslumannsembætta á landsbyggðinni. Ekki er tekið við gögnum sem berast í pósti, tölvupósti eða faxi.
Þeir sem hyggja á langtímadvöl ættu að kynna sér upplýsingar um löglega búsetu og lögheimilisskráningu áður en fyrrgreint eyðublað er fyllt út.
Nánari upplýsingar gefur EURES (www.eures.is) og Fjölmenningarsetur (sjá upplýsingasíma)
