Frágangur, móttaka og afgreiðsla dvalarleyfis

---

Ákveðnar reglur gilda um afgreiðslu umsókna og hvaða gögn þurfa að fylgja þeim en það fer eftir því um hvers konar dvalarleyfi er sótt.

---

Frágangur umsókna

Til að afgreiðsla umsókna gangi sem hraðast fyrir sig er ráðlegt að:

1. fylla umsókn vandlega út,
2. skila umsókn í frumriti og
3. gæta þess að öll fylgigögn, sem krafist er, séu til staðar.

Fylgigögn umsókna þurfa að vera í frumriti eða staðfest afrit af frumriti.

Nauðsynleg fylgigöng með öllum umsóknum

1. Ljósrit af vegabréfi.
2. Passamynd. Myndir verður að taka á skrifstofum sýslumanna eða hjá Útlendingastofnun.
3. Staðfesting á kennitölu.
4. Staðfesting á framfærslu, til dæmis launaseðlar eða greiðslur af sjálfstæðri atvinnustarfsemi. Þetta á við um ríkisborgara ríkja innan EES.
5. Staðfesting á framfærslu frá atvinnurekenda á starfshlutfalli og tímabili ráðningar eða ráðningarsamningur.
   Þetta á við um ríkisborgara ríkja utan EES.
6. Húsnæðisvottorð - Útlendingi ber að sýna fram á að hann hafi tryggt húsnæði þann tíma sem dvalarleyfisumsókn hans tekur til.

Sjá nánar tímabundið atvinnu- og dvalarleyfi

Skjöl sem getur þurft að leggja fram, eftir eðli umsóknar
Forsjárgögn, fæðingarvottorð, skilnaðargögn, heilbrigðisvottorð, hjúskaparvottorð, vottorð um staðfesta samvist, vottorð um skráða sambúð, dánarvottorð, sakavottorð og umboð.

Þýðingar á fylgiskjölum

Nauðsynlegt er að fá löggiltan skjalaþýðanda til að þýða umsóknargögn. Skjöl á ensku, dönsku, norsku og sænsku þurfa ekki að vera þýdd á íslensku.

Móttaka umsókna

• Tekið er á móti umsóknum í afgreiðslu Útlendingastofnunar og á skrifstofum sýslumanna. Staðgreiða þarf fyrir dvalarleyfisumsóknir. Afgreiðslugjald er ekki endurgreitt.

Bankareikningur Útlendingastofnunar

Gjald fyrir dvalarleyfisumsóknir

Greiðslukvittun - leiðbeiningar fyrir ríkisborgara landa utan EES

• Greitt er fyrir dvalarleyfisumsókn með því að leggja inn á bankareikning Útlendingastofnunar. Greiðslukvittun verður að fylgja umsókninni svo hún fái afgreiðslu.
• Umsókn er endursend ef greiðslukvittun fylgir ekki.
• Á greiðslukvittun þarf að koma fram nafn og kennitala umsækjanda, ef hann hefur fengið úthlutað kennitölu. Þessar upplýsingar þurfa að vera í samræmi við vegabréf umsækjanda.

>Dæmi um einstakling með kennitölu:

• 010185-4679, Jón Jónsson

>Dæmi um einstakling sem ekki hefur enn fengið kennitölu:

• 010185-JÓNSSON (Jón Jónsson)

Afgreiðsla umsókna

Eftir að öll umbeðin gögn með umsókn hafa borist er áætlaður afgreiðslutími umsókna:

• 90 dagar fyrir ríkisborgara ríkja utan EES.
• Þegar afgreiðslu umsóknar er lokið fær umsækjandi skriflega tilkynningu þess efnis.
• Umsækjandi fer með tilkynninguna og vegabréf sitt til þeirrar lögreglustöðvar sem lögheimili hans tilheyrir. Þar fær hann viðeigandi stimpil eða límmiða til staðfestingar á dvalarleyfinu í vegabréfið.
• Ef umsókn um dvalarleyfi er synjað getur umsækjandi kært ákvörðun Útlendingastofnunar til dóms- og kirkjumálaráðuneytis.

Framlenging á dvalarleyfi

• Umsókn um framlengingu á dvalarleyfi þarf að berast Útlendingastofnun minnst einum mánuði áður en gildandi dvalarleyfi rennur út.
• Það er á ábyrgð umsækjanda að umsókn um framlengingu sé lögð inn hjá Útlendingastofnun í tæka tíð.

Sjá nánar tímabundið atvinnu- og dvalarleyfi