Ríkisborgarar innan EES
Breyttar verklagsreglur vegna komu EES-ríkisborgara til landsins
EES-ríkin: Austurríki, Belgía, Búlgaría, Danmörk, Eistland, Finnland, Frakkland, Grikkland, Holland, Írland, Ísland, Ítalía, Kýpur, Lettland, Liechtenstein, Litháen, Lúxemborg, Malta, Noregur, Portúgal, Pólland, Rúmenía, Spánn, Slóvakía, Slóvenía, Stóra-Bretland, Svíþjóð, Tékkland, Ungverjaland og Þýskaland. Ríkisborgarar Sviss njóta sambærilegra réttinda og ríkisborgarar fyrrgreindra ríkja.
Í kjölfar breytinga á lögum um útlendinga (frá 1. ágúst) eru í vinnslu nýjar upplýsingar fyrir þá ríkisborgara innan EES sem vilja setjast að á Íslandi.
Helstu breytingar – Einstaklingar sem ætla sér að dvelja hérlendis í þrjá mánuði eða lengur
Helstu breytingar eru þær að ríkisborgarar innan EES þurfa ekki lengur að sækja um dvalarleyfi á Íslandi (á ekki við um ríkisborgara Rúmeníu og Búlgaríu). Þess í stað þurfa þeir að skrá sig við komuna til landsins hjá Þjóðskrá. Fylla þarf út eyðublaðið ,,Skráning EES eða EFTA útlendings hjá Þjóðskrá”. Eyðublaðið gildir í senn sem kennitöluumsókn og sem skráning fastrar búsetu (lögheimilis). Hægt er að nálgast skráningareyðublað Þjóðskrár hér en umsækjendur verða að skila því í eigin persónu til Þjóðskrár, á skrifstofur sveitarfélaga eða til sýslumannsembætta á landsbyggðinni. Ekki er hægt að senda eyðublaðið með faxi. Þeir einstaklingar sem koma til styttri dvalar en þrjá mánuði eiga ekki að fylla út framangreint eyðublað (sjá neðar á síðu).
Ákveðin gögn í frumriti, eða staðfest afrit af þeim, þurfa að fylgja umsóknareyðublaðinu. Hvaða gögn það eru fer eftir tilgangi dvalar og á eyðublaðinu má sjá hvaða gögn það eru í hverju tilviki fyrir sig. Ljósrit af vegabréfi / kennivottorði eða ferðaskílríki þarf að fylgja með öllum umsóknum.
Frumrit af vottorðum og ráðningarsamningum þarf að senda til Þjóðskrár með pósti eða fara með pappírana á staðinn og starfsfólk Þjóðskrár tekur ljósrit. Á landsbyggðinni er hægt að fara til sýslumanns og fá staðfest ljósrit svo fólk þurfi ekki að senda frumgögn. Aðeins er tekið við því sem berst í venjulegum pósti en ekki innskannað í tölvupósti eða með öðrum hætti rafrænt.
Öllum fylgigögnum, sem eru á öðrum tungumálum en ensku eða norðurlandamálum (íslensku, dönsku, sænsku eða norsku), þarf að fylgja þýðing frá löggiltum skjalaþýðanda. Þýðingin þarf að vera í frumriti eða sem staðfest afrit af frumriti.
-
Ekki þarf að greiða fyrir skráninguna
Þegar skráning hefur verið afgreidd fær viðkomandi staðfestingu senda í pósti á það heimilisfang sem skráð var á umsóknareyðublaðinu sem föst búseta (lögheimili). Ef skipt er um lögheimili þarf að tilkynna það til Þjóðskrár. Hægt er að nálgast eyðublaðið hér (,,Flutningstilkynning innanlands”).
Sjúkratryggingar
Ríkisborgarar frá EES-ríkjum sem búsettir eru hér á landi en hafa verið sjúkratryggðir í öðru EES-landi síðustu sex mánuði geta fengið sjúkratryggingu strax ef þeir leggja fram vottorð frá sjúkrasamlagi eða tryggingastofnun í fyrra heimalandi sínu sem nefnist E-104 og staðfestir tryggingatímabil þar í landi.
Skila þarf vottorðinu til Tryggingastofnunar eða umboða hennar ásamt eyðublaðinu “Skráning í tryggingaskrá” og staðfestingunni frá Þjóðskrá um skráningu á lögheimili og útgáfu kennitölu.
Ef ekki er skilað inn E-104 vottorði þá tekur sjúkratrygging ekki gildi fyrr en 6 mánuðum frá skráningu á búsetu (lögheimili).
Einstaklingar sem dveljast hérlendis í skemmri tíma
Atvinnurekendur, stofnanir, bankar, eða annað sem við á, þurfa enn að sækja um kennitölu fyrir einstaklinga innan EES sem koma til dvalar í styttri tíma en þrjá mánuði. Jafnframt ber að hafa í huga að þeir þurfa enn að skrá aðsetur sitt innan 7 daga frá komudegi.
Sjá einnig
Sjá frétt: Breytingar á lögum um útlendinga (nr. 96/2002)
