Heilsugæslustöðvar

Heilsugæsla og læknaþjónusta

Heilsugæslustöðvar eru víða um land og í öllum hverfum höfuðborgarsvæðisins. Þar er veitt öll almenn heilbrigðisþjónusta og þangað leitar fólk jafnan fyrst vegna veikinda eða annarra heilsufarsvandamála.
Kostnaður við að koma á heilsugæslustöð á dagvinnutíma (klukkan 8-16) er krónur 1.000 fyrir sjúkratryggða en 5.700 fyrir ósjúkratryggða.
Fólk á rétt á að leita til hvaða heilsugæslustöðvar sem er en æskilegast er að snúa sér til þeirrar heilsugæslustöðvar sem er næst heimili viðkomandi.

Auk almennrar læknisþjónustu sinna heilsugæslustöðvar mæðravernd, ung- og smábarnavernd, skólaheilsugæslu og hjúkrun í heimahúsum.

Lækna- og hjúkrunarmóttaka Heilsuverndar er opin virka daga á milli klukkan 9 og 12 og frá klukkan 16 til 18. Þar er bæði opin móttaka og hægt að panta tíma í síma 510-6500 alla daga milli 09-15. Þangað geta þeir leitað sem ekki eru sjúkratryggðir og boðið er upp á almenna læknisþjónustu ásamt meðferð við minniháttar áverkum.
Sömuleiðis er boðið upp á læknisskoðanir fyrir útlendinga vegna dvalarleyfis.
Móttakan er staðsett á 7. hæð í Hjartaverndarhúsinu í Holtasmára, að Holtasmára 1, 201 Kópavogi (kort). Sími: 510-6500

Utan opnunartíma heilsugæslustöðva eru ávallt heilsugæslulæknar eða hjúkrunarfræðingar á vakt við allar heilsugæslustöðvar á landsbyggðinni.
Kostnaður við að koma á heilsugæslustöð utan dagvinnutíma (klukkan 16-18) er krónur 2.600 fyrir sjúkratryggða en 8.400 fyrir ósjúkratryggða.
Ef þörf er á læknisþjónustu utan opnunartíma heilsugæslustöðva á höfuðborgarsvæðinu, það er um kvöld, nætur eða helgar, sinnir Læknavaktin þessari þjónustu að Smáratorgi 1, 201 Kópavogi, eða í síma 1770.
Kostnaður við að koma á Læknavaktina (17-23:30) er krónur 2.200 fyrir sjúkratryggða en 6.100 fyrir ósjúkratryggða.
Kostnaður við að koma á slysa- og bráðamóttöku er krónur 4.900 fyrir sjúkratryggða en 36.300 fyrir ósjúkratryggða.

Þegar sjúkratryggðir einstaklingar hafa greitt ákveðna upphæð á sama almanaksári (frá janúar til desember) fyrir heilbrigðisþjónustu eiga þeir rétt á afsláttarkorti hjá Sjúkratryggingum Íslands. Með framvísun kortsins þarf að greiða lægra verð fyrir heilbrigðisþjónustu. Mjög mikilvægt er að geyma öll afrit af reikningum (bleiku miðana) fyrir heilbrigðisþjónustu.
Á vef Sjúkratrygginga Íslands er að finna ítarlegar upplýsingar um afsláttarkort - sjá hér

Reikningar frá hjartalæknum gilda einnig upp í afsláttarkort ef sjúklingar hafa fengið tilvísun frá heimilislækni.

Kostnaður vegna þjálfunar, lyfja, tannlækninga og fleira veitir ekki rétt til afsláttarkorts. Nánari upplýsingar fást hjá Sjúkratryggingum Íslands