Alþingiskosningar 2017

18.10.2017 Fréttir

Hvar ertu á kjörskrá?

  • Kjósendur geta kannað hvar þeir eru á kjörskrá í alþingiskosningunum 28. október 2017. Þegar slegin er inn kennitala kemur upp nafn, lögheimili og sveitarfélag. Í flestum tilvikum birtast einnig upplýsingar um kjörstað og kjördeild.

Hvar áttu að kjósa?

  • Kjósendur eru á kjörskrá í því sveitarfélagi þar sem þeir eiga skráð lögheimili fimm vikum fyrir kjördag, þann 23. september 2017. Flutningur lögheimilis eftir þann tíma breytir ekki skráningu á kjörskrá.

Hverjir eiga kosningarétt?

  • Kosningarétt við alþingiskosningarnar 28. október 2017 eiga allir íslenskir ríkisborgarar sem náð hafa 18 ára aldri á kjördag og lögheimili eiga hér á landi.
  • Jafnframt eiga kosningarétt þeir íslenskir ríkisborgarar sem flutt hafa lögheimili sitt til útlanda eftir 1. desember 2008 og náð hafa 18 ára aldri á kjördag.
  • Þá eiga kosningarétt þeir íslenskir ríkisborgarar, sem flutt hafa lögheimili sitt til útlanda fyrir 1. desember 2008, enda hafi þeir sótt um það til Þjóðskrár Íslands fyrir 11. oktober 2017. Erlendir ríkisborgarar eiga ekki kosningarétt við alþingis- og forsetakosningar og eru því ekki á kjörskrá. Eina undantekningin eru danskir ríkisborgarar, sem eiga kosningarétt samkvæmt lögum nr. 85/1946, þ.e. þeir sem voru búsettir á Íslandi 6. mars 1946 eða einhvern tíma á síðustu 10 árum fyrir þann tíma.

Nánari upplýsingar er að finna hér

Senda grein