Heilsugæsla og læknaþjónusta

• Heilsugæslustöðvar eru víða um land og í öllum hverfum höfuðborgarsvæðisins. Þar er veitt öll almenn heilbrigðisþjónusta og þangað leitar fólk jafnan fyrst vegna veikinda eða annarra heilsufarsvandamála.
• Fólk á rétt á að leita til hvaða heilsugæslustöðvar sem er en æskilegast er að snúa sér til þeirrar heilsugæslustöðvar sem er næst heimili viðkomandi.
• Auk almennrar læknisþjónustu sinna heilsugæslustöðvar mæðravernd, ung- og smábarnavernd, skólaheilsugæslu og hjúkrun í heimahúsum.
• Þeir sem eru sjúkratryggðir þurfa aðeins að borga hluta af komugjaldi þegar þeir leita læknis en þeir sem ekki eru sjúkratryggðir þurfa að borga fullt gjald.

Læknaþjónusta utan opnunartíma heilsugæslustöðva

• Utan opnunartíma heilsugæslustöðva eru ávallt heilsugæslulæknar eða hjúkrunarfræðingar á vakt við allar heilsugæslustöðvar á landsbyggðinni.
• Ef þörf er á læknisþjónustu utan opnunartíma heilsugæslustöðva á höfuðborgarsvæðinu, það er um kvöld, nætur eða helgar, sinnir Læknavaktin þessari þjónustu í síma 1770.

Allir eiga rétt á túlkun þegar þeir þurfa að notfæra sér þjónustu heilbrigðiskerfisins tali þeir ekki íslensku. Ef viðkomandi þarf á túlki að halda þarf hann að taka það fram þegar tími er pantaður hjá lækni á heilsugæslustöð eða á sjúkrahúsi. Ef viðkomandi er sjúkratryggður á hann rétt á endurgreiðslu kosnaðarins, annars þarf hann að borga sjálfur.